REUZENGILDE GIGANTIUS 50 JAOR!

‘T waor op 28 december 1968, d’n daag vaan de onnuzel kinder, tot in ‘t bovenzäölke vaan de kaffee de Knijnspiep, gèt speciaals gebäörde…..

De aajd-oppers en aajd-prinse vaan ‘Jäög Vastelaovendvereiniging de Strabenders’ höbbe op dee daag ‘t Reuzengilde Gigantius opgeriech.

Ter iere vaan ‘t 11-jarig zjubelei vaan de Strabenders, woort ‘ne reus aangeboje aon de stad Mestreech. Basis veur dee reus waor ‘n middelieuws spaons gesjrif boe in ‘ne reus besjreve stoond dee opgesteld stoond aon de stadspoort vaan Mestreech tijdens de ‘Blyde incomste’ in 1550. Karel V dee heijmet z’ne zoon Philips II kaom veurstelle in zien riek, trof aon de stadspoort ‘ne reus es representant vaan de bevolking vaan Mestreech die ‘ns eve lete zien wee zie waore. Dee reus, veur geine bang, nogal rauw mèt rollende ouge, ‘ne flinke baard, ‘ne hood en aon z’n reem ‘ne bugel mèt daorin twie kinnekes, ‘verwelkomde’ ‘t Spaonse bezeuk….. meh eigelek stond dee Reus symbool veur de Mestreechtenere die de machhöbbers leever kwiet es riek waore. Die twie kinnekes die heer ‘in de tès’ had, stelde de twiehierigheid veur.

Stadsreus Gigantius waor gebore.

Gigantius is sinds ‘68 ‘n bekind figuur in Mestreech en daorboete. Heer representeert nog ummer Mestreech en de Mestreechtenere (meh noe veurnaomelek op ‘n vruntelekere meneer) tijdens väöl sjieke gelegenhede. Zoe waor heer op väöl plaotse in binne- en boetenland present. Vaan Paries tot Wenduine, vaan Mallorca tot Wûnseradiel en vaan Genève tot Moergestel.

Venaovend treffe de Gildebroeders en zusterkes vaan Gieg, alle Ouderlincs en aajd-leije um gruuts ‘t gouwe Zjubelei vaan uzze gigantische vrund te viere!

Op nog ‘ne kier 50 gigantische jaore!